पौष २ देखि धादिङ महोत्सव हुँदै

धादिङबेसी मंसिर १६ । ‘धादिङको दिगो विकास र अर्थतन्त्रको आधार, कृषि, जलस्रोत, पर्यटन तथा उद्योगको पूर्वाधार’ भन्ने मुल नाराका साथ चौथो धादिङ महोत्सव २०७१ पौष २ गतेदेखी १३ गतेसम्म धादिङवेसीमा हुने भएको छ । धादिङ उद्योग वाणिज्य संघका अध्यक्ष चन्द्रकान्त अधिकारीले आज धादिङवेसीमा पत्रकार सम्मेलनको आयोजना गरि सो को जानकारी गराउनुभएको हो ।
धादिङवेसी खुल्ला मञ्चमा पौष ९ देखि हुने भनिएको महोत्सव विशेष कारणबस एक हप्ता अगाडि सर्न गएको पत्रकार सम्मेलनमा संघका अध्यक्ष अधिकारीले बताउनुभयो ।

धादिङ जिल्लाको सांस्कृतिक विविधताको संरक्षण गरी समग्र आर्थिक, सामाजिक विकासका लागि पर्यटन, कृषि उद्योग व्यापार, शिक्षा स्वास्थ्य क्षेत्रको विकास तथा सांस्कृतिक जागरण र पर्यटकीय क्षेत्रको प्रवद्र्धन गर्नु नै महोत्सवको लक्षय भएको अध्यक्ष अधिकारीले बताउनुभएको छ ।
पत्रकार सम्मेलनमा बोल्नुहुँदै अध्यक्ष चन्द्रकान्त अधिकारीले जिल्लामा उत्पादित कृषि क्षेत्र तथा बजार प्रबद्र्धन, दुग्धजन्य उत्पादनको प्रदर्शनी एवम् प्रचार–प्रसार, पर्यटन क्षेत्रको प्रचार–प्रसार, विभिन्न जातजातिको कला, संस्कृति, भेषभुषाको जगेर्ना गर्ने लगायत रहेको बताउनुभयो । आफूहरुले २०६४ सालमा प्रथम धादिङ महोत्सवको आयोजना सुरु गरेर जिल्लाको आर्थिक विकासबारे ध्यान दिएको बताउँदै अध्यक्ष अधिकारीले महोत्सवले जिलाको प्रचार–प्रसारका साथै, आर्थिक विकासमा सहयोग गर्ने बताउनुभयो । चौथो धादिङ महोत्सव सफल पार्न आम ब्यवसायीहरुलाई आग्रह समेत गर्नुभएको थियो । जिल्लामा एकै ठाउँमा एकैचोटी २ वटा महोत्सवको खाँचो नभएको भए पनि आफूहरुले सबै तयारी गरिसकेकोले पछि हट्न नसकिएको दोहो¥याउनुभयो ।
आफूहरु सरकारी पैसा लिएर महोत्सवमा खर्च नगर्ने पक्षमा रहेको बताउनुहुँदै अध्यक्ष अधिकारीले यो वर्षदेखी सरकारी पैसा सामाजिक विकासका क्षेत्रमा खर्च गर्ने स्पष्ट समेत पार्नुभएको छ । पौष २ गतेदेखी १३ गतेसम्म धादिङवेसी फिल्महलचोक नजिकै प्लटिङमा गर्ने भनिएको महोत्सव स्थलमा सोमबारदेखी नै निर्माण कार्य सुरु गरिसकिएको छ ।
सचिवालयले महोत्सव सम्पन्न गर्नका लागि १५१ सदस्यीय मुल आयोजक समिति, ५१ सदस्यीय सल्लाहकारी समिति तथा १५ सदस्यीय विषयगत समिति गठन गरेर काम सुरु गरेको जानकारी दिएको छ ।