बिरामी कुरूवा ढुकुर !

२२ साउन, मोरङ । एउटा ढुकुर दिनहुँ एउटै समयमा आउँछ, दिनभरि बिरामी रुङ्छ र फर्किन्छ । मान्छे र पशुपक्षीबीचको मित्रता त सुनिँदै/देखिँदै आएको हो तर ढुकुर नै यसरी बिरामी कुरुवा बनेको खबर भने पत्याउन मुस्किलै पर्छ । तर, मोरङ जिल्लाको सुन्दरपुर गाविस–४ मा पत्याउनैपर्ने घटना भएको छ । बिरामी कुरुवा ढुकुर हेर्न हिजोआज बिरामीको घरमा घुइँचो नै लाग्ने गरेको छ ।५० वर्षीया धनमाया गुरुङ बिरामी परेपछि उनलाई एउटा ढुकुरले साथ दिइरहेको छ धनमायालाई कुर्न हरेक दिन बिहानै ढुकुर आउने गर्छ । यो क्रम करिब २२ दिनदेखि जारी छ । स्थानीय बासिन्दाका अनुसार पेटसम्बन्धी रोगबाट पीडित धनमायालाई कुर्न ढुकुर बिहान ६ बजे आउँछ । दिनभर बिरामीको साथमै बसेर ढुकुर साँझ ६:४५ बजेतिर फर्कन्छ । ‘यतिसम्म कि ढुकुर समाउन खोज्दा अरूसँग मान्दैन भने बिरामीसँग सहजै मान्छ,’  सौर्यदैनिकले गरेको कुराकानीमा स्थानीय किशोरी अस्मिता राईले भनिन्, ‘अरूले दिएको खानेकुरा पनि खाँदैन, बिरामीले दिएको मात्र खान्छ ।’ कमजोर आर्थिक अवस्थाका धनमायाका पति, तीन छोरा र एक छोरी छन् । उनका सबै छोराछोरीको बिहेबारी भइसकेको छ । दुई छोरा वैदेशिक रोजगारमा र माइला छोरा सुनसरीको इटहरीस्थित एक सुनचाँदी पसलमा काम गर्छन् । माइला छोराबुहारी र पति धु्रवसँग बस्दै आएकी धनमायालाई दुई महिनादेखि पेटसम्बन्धी रोगले सताएको खबर सौर्य दैनिकले छापेको छ ।