एमाओवादी धादिङको सम्मेलन २२ वर्ष पछि भोली हुँदै

धादिङ १२ माघ । एकीकृत नेकपा माओवादी धादिङको भोलि हुने एकताको दोस्रो जिल्ला सम्मेलनको सम्पूर्ण तयारी पूरा भएको सम्मलेन आयोजक मूल समितिका संयोजक पुष्पविक्रम मल्लले बताउनुभएको छ । सम्मेलन २२ वर्ष पछि भोली हुने भएको हो । मल्लले लामो समयपछि सम्पन्न हुन लागेको पार्टीको जिल्ला सम्मेलन भव्य र ऐतिहासिक हुने बताउनुभयो । सम्मेलन उद्घाटनका लागि माओवादी स्थायी समिति सदस्य तथा अर्थमन्त्री बर्षमान पुनले उद्घाटन गर्ने माओवादीले बताएको छ ।

सम्मलेनको पूर्व सन्ध्यामा वाइसिएल धादिङले कमेरे डाँडाबाट शुरु गरेको मोटर साइकल ¥याली बजारको विभिन्न भागहरु परिक्रमा गरी बीचबजार चोकमा कोणसभामा परिणत भएको थियो । कोण सभालाई सम्बोधन गर्दै एकीकृत नेकपा माओवादी एकताको सातौं महाधिवेशन आयोजक समितिका सदस्य तथा पूर्व विज्ञान तथा प्रविधि मन्त्री कल्पना धमलाले परिवर्तनका सम्पूर्ण एजेण्डाहरु माओवादी आन्दोलनबाट स्थापित भएकोले अन्य भ्रममा नपर्न अनुरोध गर्नुभयो । हिजो गणतन्त्र, धर्मनिरपेक्षता, समावेशी तथा समानुपातिक र संविधानसभाको एजेण्डामा तयार नभएर माओवादीको टाउकोको मूल्य तोक्नेहरुले अहिले जनतालाई भ्रम बाँडिरहेकोप्रति आक्रोश व्यक्त गर्दै जनसमुदायहरुलाई सचेत हुन आग्रह गर्नुभयो । कोणसभालाई सम्बोधन गर्दै एमाओवादी नेता रामबहादुर भण्डारीले एमाओवादी सम्मेलनको उद्घाटन सत्रमा सहभागी हुन आम धादिङबासीलाई अनुरोध गर्नुभयो ।
सम्मेलनको लागि धादिङबेसीको पुछारबजारबाट शुरु हुने पञ्चेबाजा, विभिन्न सांस्कृतिक झाँकीहरुसहितको विशाल ¥याली खुलामञ्चमा पुगेर जनसभामा परिणत हुने माओवादीले बताएको छ । दुई दिनसम्म चल्ने सम्मेलनको सम्पूर्ण तयारी पूरा भइसकेको विभिन्न उपसमितिहरुले जानकारी दिएका छन् । सम्मेलनको उद्घाटन सत्रमा काठमाडौंबाट आउने विभिन्न सांस्कृतिक टोलीहरुले सांगितीक प्रस्तुतीहरु प्रस्तुत गर्ने माओवादीले जनाएको छ ।