उत्तरी धादिङमा सवारी सञ्चालनमा रोक

 धादिङबेसी असार ११ / मनसुन शुरु भएसँगै दैनिकजसो बर्षा हुन थालेपछि  जिल्लाका ग्रामीण सडकहरुमा यातायातका साधन सञ्चालनमा रोक लगाईएको छ । जिल्ला विकास समिति धादिङले सूचना प्रकाशित गरी यातायातका साधनहरु सञ्चालन नगर्न-नगराउन सम्पूर्ण यातायात व्यवसायीहरुलाई आग्रह गरेको छ । वर्षायाममा कच्ची सडकहरुमा यातायात सञ्चालन गर्दा सडकहरुको संरचना नै विग्रिने भएकाले यातायत सञ्चालनमा रोक लगाइएको जिल्ला विकास समिति धादिङले जनाएको छ । नेपाल सरकार, विदेशी दातृ संस्था तथा जिल्ला विकास समिति धादिङको लगानीमा सडकहरुको निर्माण कार्य भैरहेकाले त्यसमा प्रभावन नपरोस भनेर यातायात बन्द गरिएको हो । जिल्लाका अधिकांश ग्रामिण सडकहरु कच्चि नै छन् । केहिमा ग्रावेल र ओटासिल गरिएपनि त्यसको अवस्था समेत कच्ची सडकभन्दा नाजुक बनिसकेको छ ।   

जिल्ला विकास समितिले सूचना मार्फत सडकहरुमा ग्राभेल एवम् कालोपत्रे गर्ने काम भैनसकेको अवस्थामा वर्षायामको समयमा यातायातको साधनहरु सञ्चालन भएमा अत्यन्त धेरै क्षति हुने भएकाले यतायात सञ्चालन नगर्न आग्रह गरेको हो । यसअघि १८ औं जिल्ला परिषदबाट असार १० गतेदेखि असोज १० गतेसम्म यातायातका साधनहरु बन्द गर्ने निर्णय समेत भएको थियो । जिल्ला स्थित राजनीतिक दलका प्रमुखहरु र जिविस धादिङको सहमतिमा यातायात सञ्चालनमा रोक लगाइएपछि विभिन्न ग्रामिण क्षेत्रमा जाने यात्रुहरु प्रभावित भएका छन् । जिविसले यसअघि नै उपभोग्य समानहरुको जोहो गर्न व्यवसायीहरुलाई आग्रह गरेको थियो । तर पनि एकैपटमा लगिएको उपभोग्य सामानहरुले तीन महिनासम्म नधान्ने हुँदा ग्रामिण क्षेत्रमा उपभोग्य तथा अत्यावश्यक सामानहरुको अभाव हुने व्यवसायीहरुले बताएका छन् ।

यसैबीच यातायात व्यवसायीहरुले भने ग्रामिण सडकहरुमा अत्यावश्यकीय बस्तु ढुवानीको लागि साना सवारी साधनहरुलाई चल्न दिनुपर्ने बताएका छन् । संयुक्त यातायात व्यवसायी समिति धादिङका संयोजक गोविन्दकुमार श्रेष्ठले साना सवारी साधनलाई सञ्चालन गर्न दिनुपर्ने आफूहरुको माग रहेको बताउनुभएको छ । यसविषयमा भोली जिल्ला विकास समिति धादिङ सहित सरोकारवालाहरु बीच छलफलको तयारी गरिएको भन्दै श्रेष्ठले साना सवारी साधनहरु सञ्चालन हुन दिईने विश्वास व्यक्त गर्नुभएको छ ।