रामघाटको सेती नदीमा २२ घर डुवान, २९ जनाको उद्धार

पोखरा, असार २८–
बुधवार राती पोखरा आसपासमा भिषण वर्षापछि सेती नदीमा बाढी ले ठुलो क्षेति पुर्याएको छ । सेती नदीमा आएको बाढीका कारण पोखराको रामघाटस्थित खोला किनारमा रहेका २२ घर डुवानमा परेका छन् । बाढीका कारण २० घर उच्च जोखिममा रहेको कास्की प्रहरीले जनाएको छ । गएराती अबिरल बर्षासंगै नदीमा पानीको बहाव बढ्दा पोखराको रामघाटमा खोला  थुनिएर ताल बन्दा नदी किनारको घर डुवाएको हो । २२ घर मध्ये ७ घरमा मात्र सर्वसाधारण बसोबास गर्दै आएको थिए । सात घरमा रहेका २९ जनालाई अन्यत्र सारिएको छ । बाढीले बस्ती डुबाएपछि, त्यहाँका वासिन्दाले घरका छतहरुमा बसेर ज्यान जोगाएका थिए।
रामघाट क्षेत्रमा राती ठूलो ताल बनेको र जिल्ला प्रहरी कार्यालयबाट गएको प्रहरी टोली र सशस्त्र प्रहरी बल कालिका गणका जवानहरुले लेकसाईडबाट डुंगा मगाई घरका छतमा बसेकाहरुलाई उद्दार गरिएको थियो ।
बाढीका कारण केही घरपालुवा पशुपंक्षी मरेको भएपनि कुनै मानवीय क्षति नभएको जिल्ला प्रहरी कार्यालय कास्कीले जानकारी दिएको छ ।  पोखरामा बुधवार साँझ ७ बजे पछिको १२ घण्टाको अवधिमा मात्रै ९१।८० मिलिमिटर पानी परेको थियो ।