दम्पतीमाथि आक्रमण गर्ने चार अभियुक्त सार्वजनिक

धादिङ, साउन १६ । उत्तरी धादिङको झार्लाङ गाविसका एक दम्पतीमाथि ज्यान मार्ने उद्देश्यले आक्रमण गर्ने चार जनालाई जिल्ला प्रहरी कार्यालयले सार्वजनिक गरेको छ ।  अभियुक्तहरूले गत असार २३ गते राति झार्लाङ गाविस–४ ङम्देन निवासी ५६ वर्षीय जङ्गबहादुर तामाङ र उनकी श्रीमती ६३ वर्षीया कान्छीमाया तामाङलाई सुतिरहेको अवस्थामा ढुङ्गाले टाउकोमा प्रहार गरी सख्त घाइते बनाएका थिए । 

सो घटनामा संलग्न धादिङ झार्लाङ गाविस–४ निवासी सुली भन्ने आकाश तामाङ, झार्लाङ–९ घर भई हाल मुरलीभञ्ज्याङ–२ ससाह निवासी २० वर्षीय सन्तबहादुर तामाङ, झार्लाङ–२ घर भई हाल मुरलीभञ्ज्याङ–२ ससाह निवासी २० वर्षीय मर्चा भन्ने अनिफ तामाङ र २२ वर्षीय तिलमान तामाङलाई प्रहरीले सार्वजनिक गरेको हो । अभियुक्त आकाश तामाङ यही साउन ५ गते र अन्य तीन जना साउन ६ गते धादिङको विभिन्न स्थानबाट पक्राउ परेका प्रहरीनायब उपरीक्षक गणेश रेग्मीले बताए ।

घाइते जङ्गबहादुर तामाङले धामी–झाँक्रीको समेत काम गर्ने गरेका र अभियुक्त आकाश तामाङ सधँै बिरामी भइराख्ने भएकाले आकाशलाई जङ्गबहादुरले नै बिरामी बनाएको भन्दै जङ्गबहादुर दम्पतीमाथि कुटपिट गरेको अभियुक्तहरूले प्रहरीसमक्ष स्वीकार गरेका छन् । आक्रमणमा संलग्न चारैजनालाई सोमबार पत्रकारसम्मेलन गरी प्रहरीले सार्वजनिक गरेको हो । घाइते दम्पतिको हाल काठमाडाँैमा उपचार भइरहेकोमा जङ्गबहादुरको अवस्था चिन्ताजनक रहेको बताइएको छ । दम्पतीको हत्याका लागि अभियुक्त आकाश तामाङले ४६ हजार रुपैयाँ आफूहरूलाई दिएको र अझै पैसा दिने कबोल गरेको बयानका क्रममा उनीहरूले बताएका छन् ।

यसैबीच, अपाङ्गता भएकी ५६ वर्षीया महिलालाई बलात्कार गर्ने जोगिमारा गाविस–९ चौकीटारका एक युवकलाई प्रहरीले पक्राउ गरेको छ । चौकीटारका २७ वर्षीय सुदिरचन्द्र अधिकारीले यही साउन १२ गते ती महिलालाई घर नजिकै बलात्कार गरेकोले गाउँलेको पहलमा प्रहरीले निजलाई पक्राउ गरेको हो । प्रहरीले अधिकारीविरुद्ध जबर्जस्ती करणी मुद्दा दर्ता गरी अनुसन्धान प्रक्रिया अघि बढाएको प्रहरी निरीक्षक राजकुमार थिङले जानाकारी दिए ।

आफ्नो घरमा बोलाएर र महिलाकै घरमा गएर पटक–पटक आफूले ती महिलालाई बलात्कार गर्ने गरेको अधिकारीले प्रहरीमा बयान दिएका छन् । ती महिला बोल्न नसक्ने भएकीले अधिकारीले यसको फाइदा उठाएर विभिन्न बहानामा बलात्कार गर्दै आएको स्थानीयवासीको भनाइ छ । जिल्लामा क्रियाशील अधिकारकर्मी र महिलाअधिकारका क्षेत्रमा क्रियाशील सङ्घसंस्थाले अपाङ्गता भएकी महिलामाथि गरिएको यौनशोषणको निन्दा गर्दै पीडकलाई कडा कारबाही गर्न माग गरेका छन् ।