आज हलोक्रान्ति दिवस

काठमाडौं, साउन ११– देशमा प्रजातन्त्रको उदय हुनुअघि विक्रम संवत २००६ साल साउन ११ गते आजकै दिन राणा सरकारको तानशाही संस्कारसँगै मौलाएको ब्राम्हणवाद र जातीय भेदभावसँगै हलीप्रथा अन्त्यका लागि पहिलोपटक लमजुङको दुराडाँडा अर्चल्यानीका बाहुनहरुले २७ जना बाहुनहरुले सामुहिकरुपमा हलोले खेत जोतेका थिए । यसैको सम्झनामा आजको दिनलाई हलोक्रन्ति दिवसको रुपमा मनाउने गरिएको छ ।

पण्डित तोयानाथ अधिकारीको अगुवाइमा लेफ्टिनेन्ट शेषकान्त अधिकारी, मुखिया हरिभक्त पौडेल, मायानाथ पौडेल, श्रीकान्त अधिकारीलगायतका बाहुनहरुले हलो समाएको भन्दै उनीहरुलाई तत्कालीन राणा शासकले दण्ड सजाय दिएको थियो ।

२००६ सालमा दुराडाँडामा पहिलोपटक हलो जोतेपछि तनहुँ, कास्की र धादिङमा पनि जोत्न सुरु गरिएको थियो । २००७ साल बैशाखमा अर्घाखाँची र गोरखा तथा २००८ सालमा स्याङ्जामा पनि हलो जोत्न शुरु गरिएको थियो ।

बाहुनहरुले पहिलोपटक हलो जोतेको स्मरणमा लमजुङको दुराडाँडामा पण्डित तोयानाथ अधिकारी स्मृति प्रतिष्ठानले आज विभिन्न कार्यक्रम गर्दैछ ।