एकीकृत माओवादीको विस्तारित बैठक सुरु

काठमाडौ, श्रावण २ - एकीकृत माओवादीको सातौं विस्तारित बैठक मंगलबारदेखि राजधानीमा हुँदैछ । भृकुटीमण्डपमा जारी बैठकमा उद्‌घाटन सत्र सुरु भएको छ । सचिव पोष्टबहादुर बोगटीले कार्यक्रम संचालन गर्दैछन् । उद्‌घाटन सत्रको अध्यक्षता पार्टी अध्यक्ष पुष्पकमल दाहालले गरेका छन् ।

पार्टी विभाजनपछि हुन लागेको बैठकले आगामी राजनीतिक कार्यदिशा तय गर्नेछ । राष्ट्रिय सम्मेलन हुन नसकेको अवस्थामा विस्तारित बैठक पार्टीभित्रको सर्वोच्च अंग हो । यसअघि सोमबारबाट सुरु हुने भनिएको बैठक कृष्णभीरमा भएको दुर्घट्नामा कार्यकर्ताको निधन भएपछि एक दिनलाइ स्थगित गरिएको थियो ।

अध्यक्ष दाहालले विगतको समीक्षा गर्दै आगामी कार्यदिशासहितको राजनीतिक दस्तावेज बैठकमा पेस गर्नेछन् । दाहालको दस्तावेजमाथि चार दिनसम्म चलेको पोलिटब्युरो र केन्द्रीय समिति बैठकले छलफल गरिसकेको छ । पार्टी विभाजनपछिको विस्तारित बैठकले विशेषगरी नयाँ कार्यदिशा निर्माण, पार्टी शुद्धीकरण योजना र महाधिवेशनको मिति तय गर्ने छ ।

बैठकले पहिलेको कार्यदिशालाई परिमार्जन गरी नयाँ कार्यदिशा तय गर्न सक्छ । यसअघि पालुङटार विस्तारित बैठकले जनविद्रोहको कार्यदिशा अनुमोदन गरेको थियो । त्यो कार्यान्वयन हुन नसकेपछि एमाओवादी पुनः शान्ति र संविधानको कार्यदिशामा फर्किएको थियो ।

दुई दशकदेखि हुन नसकेको महाधिवेशन आगामी फागुनमा गर्ने दाहालको प्रस्तावलाई बैठकले अनुमोदन गर्ने सम्भावना छ । बैठक पाँच दिन चल्ने छ ।  भेलामा मुलुकभरबाट ५ हजार बढीको सहभागिता छ ।