पूर्व लडाकूहरुले हिसाब मागेपछि माओवादी विस्तारित बैठक अवरुद्ध

३ साउन, काठमाडौं । शिविरमा अनियमिता भएको भन्दै छानविनको माग गरी पूर्व लडाकूहरुले नारावाजी गरेपछि एकीकृत नेकपा माओवादी विस्तारित बैठक अवरुद्ध भएको छ । पूर्व लडाकूहरूले शिविरमा बस्दा आफूहरुले बुझाएको रकमको हिसाब खोज्दै भृकुटीमण्डपमा जारी विस्तारित बैठकमा नारावाजी गरेका हुन् ।

लडाकूहरुको नाराबाजीपछि माओवादी अध्यक्ष प्रचण्डले विस्तारित बैठक भोली बिहीबार विहान ११ बजेसम्मका लागि स्थगित भएको घोषणा गर्नुभयो । लडाकूहरुको माग जायज भएको भन्दै उहाँले यसबारे पार्टीमा छलफल गरेर सम्वोधन गर्ने बताउनु भएको छ ।

बुधबारको बैठकमा अध्यक्ष प्रचण्डको प्रतिवेदनमाथि भएको समूहगत छलफलका निकर्ष प्रस्तुत गर्ने कार्यक्रम थियो । प्रचण्डको प्रतिवेदनमाथि छलफल गर्न माओवादीले १४ बटा समूह बनाएको छ ।

पूर्व लडाकूहरुले पार्टी अध्यक्ष पुष्पकमल दाहाल प्रचण्डले आफ्नो कमजारी स्वीकार गरी लडाकू कमाण्डरहरुलाई सम्वोधन नगरेसम्म विस्तारित बैठक चल्न नदिने चेतावनी दिएका छन् ।

शिविरमा भएको अनियमिताको छानविन गर्नु पर्ने, आर्थिक पारदर्थिता हुनु पर्ने, पार्टीभित्र मैलाएको गुट अन्त्य गर्नु पर्ने र आफूलाई राजनीतिक हैसियत दिनु पर्ने लगायतका ११ बुँदे माग अघि सारेका छन् । उनीहरुले कम्पनी सहायक कमाण्डरदेखि माथिका पूर्व लडाकूहरुलाई राजय समिति सदस्यमा बढुवा गर्न, जनमुक्ति सेना विघटन भएको अवस्थामा शसत्त, संगठन बनाएर जनताको घरदैलोमा जान पाउनु पर्ने माग गरेका छन् ।