गुरुङ विदामा जिम्मेवारी गौरवशमशेरलाई

काठमाडौ, श्रावण २५ - सेनाको सर्वोच्च पद प्रधान सेनापतिको कार्यभार बिहीबारबाट गौरवशमशेर जबराले लिएका छन् । परम्पराअनुसार आफ्नो कार्यकाल सकिनु एक महिनाअघि शुक्रबारबाट बिदा बस्न लागेका प्रधानसेनापति छत्रमानसिंह गुरुङले सैनिक मुख्यालय जंगी अड्डामा बिहीबार दिउँसो एक कार्यक्रमबीच बलाधिकृत रथीको जिम्मेवारी सम्हालिरहेका जबरालाई कार्यभार सुम्पिएका हुन् ।

मन्त्रिपरिषद्को साउन १७ गतेको बैठकले जबरालाई साउन २६ देखि लागू हुने गरी कायममुकायम प्रधानसेनापतिमा नियुक्त गरेको थियो । गुरुङले भदौ २३ मा अवकाश पाएपछि जबरा प्रधानसेनापति बन्नेछन् । समारोहमा का पीएसओ, रथी तथा अधिकृतहरुको उपस्थिती थियो । प्रधानसेनापति गुरुङ शुक्रबारदेखि बिदामा बस्दैछन् । गुरुङले कार्यभार बुझाउनुअघि भदौ २४ गते खाली हुन जाने प्रधान सेनापति पदमा  कामु प्रधान सेनापति जबराको नाम पदोन्नती तथा नियुक्तिको लागि सिफारिससहित बिहीबार नै रक्षा मन्त्रालयमा पत्र पठाएका छन् । प्रधानसेनापति गुरुङले कामु जबरालाई सँगै लगेर बुधबार नै राष्ट्रपति रामवरण यादव र प्रधानमन्त्री बाबुराम भट्टराईसमक्ष आफ्नो उत्तराधिकारीका रूपमा चिनाएका थिए । बाहिरिने प्रधानसेनापतिले आफ्नो उत्तराधिकारीलाई औपचारिक रूपमा राष्ट्रपति र प्रधानमन्त्रीसँग भेट गराउने प्रचलन छ ।

२०१२ मंसिर २७ मा जन्मिएका जबरा २०३० भदौ २० मा सेनामा प्रवेश गरेका हुन् । बेलायतको स्यान्डहस्र्टस्थित रोयल मिलिट एकेडेमीबाट आधारभूत सैन्य तालिम लिएका जबराले अमेरिका क्यानससको फोर्थ लेभेनवर्थस्थित यूएस आर्मी कमान्ड एन्ड स्टाफ कलेजबाट ग्रयाजुएसन गरेका हुन् । उनले नेसनल डिफेन्स कोर्स पाकिस्तानबाट गरेका छन् ।ekantipur