भाडाका यातायात बन्दका कारण जनजीवन प्रभावित

धादिङबेसी २६ श्रावण ।  बिभिन्न माग राख्दै यातायात व्यावसायीहरुले आह्वान गरेको बन्दका कारण आज देशभरको जनजीवन प्रभावित भएको छ । व्यावसायीहरुको बन्दका कारण देशभरमा भाडाका सवारी साधन विहानैदेखि चलेका छ्रैनन् । 

ट्राफिक महाशाखाका अनुसार काठमाडौ उपत्यकाका तीन ओटै जिल्लामा पनि विहानैदेखि कुनै पनि भाडाका सवारी साधन चल्न सकेका छैनन् । निजी सवारी साधन भने चलिरहेको प्रहरीले जनाएको छ । भाडाका सवारी साधन नचल्दा गन्तव्यमा पुग्न नागरिक पैदल हिड्न बाध्य भएका छन् ।
यातायात व्यवसायीहरुले छुट्टै यातायात मन्त्रालय गठन गर्नुपर्ने, यातयात क्षेत्रलाई उद्योगको सरह मान्यता दिनुपर्ने, ट्राफिक प्रहरीलाई दिइएको थप अधिकार खारेज गर्नुपर्ने, ट्राफिक जरिवानामा सरकारबाट दिइएको कमिशन रकम सम्बन्धि निर्णय खारेज गर्नुपर्ने, यातयात क्षेत्रमा सामाजिक सुरक्षा कार्यान्वयन गर्नुपर्ने ,विमा नीति लागु गर्नुपर्ने लगायतका माग अघि सारेका छन् । सरकारसँग यसअघि पटकपटक भएका सहमतिहरु कार्यान्वयन गर्न दवाव पुगोस भनेर पनि भाडाका सवारी साधन नचलाउने निर्णय भएको नेपाल यातायात व्यावसायी महासङ्घका कोषाध्यक्ष सरोज सिटौलाले सीआईएनलाई जानकारी दिनुभयो ।
 नेपाल यातयात व्यवसायी राष्ट्रिय महासङ्घ, अखिल नेपाल यातयात मजदूर सङ्घ, नेपाल यातायात मजदूर सङ्घ र नेपाल यतायात स्वतन्त्र मजदूर संगठनको संयुक्त आयोजनमा बन्द आह्वान गरिएको हो । यसैगरि धादिङमा पनी बन्दको पुर्ण प्रभाव परेको छ । विहानै देखि धादिङबाट छुट्ने लामो तथा छोटा दुरीका सवारी साधन चलेका छैनन् भने विहानी कक्षका शैशिक्षक संघ संस्था तथा उद्योग कलकारखाना तथा पसलहरु  भने सञ्चालनमा रहेको जिल्ला प्रहरी कार्यलय धादिङले जानकारी दिएको छ ।