वाइसिएल अब महासंघको संरचनामा

समाचार संवादादता/ काठमाडौं, १४ साउन । एकीकृत नेकपा माओवादीको सहायक संगठनको रूपमा रहेको योङ कम्युनिस्ट लिग नेपालको नाम परिवर्तन गरिने भएको छ । वाइसिएलको केन्द्रीय समितिको पूर्ण बैठकले नाम परिवर्तनको निर्णय गरेको हो । एकीकृत माओवादीका अध्यक्ष प्रचण्डको उपस्थितिमा माओवादी केन्द्रीय कार्यालय पेरिसडाँडा कोटेश्वरमा शनिबार सम्पन्न केन्द्रीय समिति बैठकले वाइसिएलको नाम परिवर्तन गर्ने निर्णय गरे पनि नामको टुंगो भने मंसिर दोस्रो हप्ता हुने राष्ट्रिय सम्मेलनले मात्रै गर्ने भएको छ । राष्ट्रिय सम्मेलन मंसिर १५ देखि १७ सम्म राजधानी काठमाडौंमै गर्ने निर्णय बैठकले गरेको छ ।

त्यसैगरी, यसअघि पार्टीको सहायक संगठनको रूपमा रहेको वाइसिएल अब ट्रेड युनियन महासंघकै जस्तो संरचनामा लैजाने निर्णय पनि बैठकले गरेको छ । अब वाइसिएल पनि महासंघको संरचनामा लैजाने निर्णय भयो । बैठकका निर्णयबारे समाचारलाई जानकारी गराउँदै वाइसिएल केन्द्रीय सदस्य एवं उपत्यका इन्चार्ज चन्द्रबहादुर थापा 'सागर'ले भने 'महासंघ अन्तर्गत ८/१० वटा घटक संघहरू निर्माण गरिन्छ ।' उनले राष्ट्रिय सम्मेलनपूर्व अहिले भइरहेको सांगठनिक संरचनाहरूको क्षेत्रीय र जिल्लास्तरमा बैठक, भेला र सम्मेलनहरू गरिने जानकारी दिए । उनले महासंघको संरचना निर्माण गरी लाखौं युवाहरूलाई संगठित र परिचालित गरिने बताए । प्रत्येक घटक संघहरूसँग लाखभन्दा बढी युवा साथीहरू संगठित हुन्छन् । हामी उनीहरूलाई विकास, उत्पादन र संघर्षमा आवश्यकताअनुसार परिचालन गर्छौं । नाम परिवर्तन र महासंघको अवधारणामा जानेलगायतका  निर्णयहरूको अनुमोदन भने राष्ट्रिय सम्मेलनले गर्ने उनले बताए ।

वाइसिएलको नामकै विषयमा  कांग्रेस-एमालेलगायतका प्रतिपक्षी दलहरूले विरोध जनाएपछि माओवादीले यसअघि वाइसिएललाई  निष्त्रिmय बनाई जनस्वयंसेवक दल बनाउने निर्णय गरेको थियो । तर, त्यसको संयोजक तोकिएका तत्कालीन स्थायी समिति सदस्य नेत्रविक्रम चन्द विप्लवको अभिव्यक्ति र गतिविधिप्रति वाइसिएल र पार्टीभित्रैबाट आलोचना भएपछि उक्त संगठनको आधिकारिक घोषणा नहुँदै विघटित अवस्थामा पुगेको थियो । पार्टीभित्रको असन्तुष्ट वैद्य पक्ष अलग्गिएर गएपछि भएको वाइसिएलको पूर्ण बैठकमा दुई सयभन्दा बढी केन्द्रीय सदस्यहरूको सहभागिता रहेको थियो । यसअघि वाइसिएलको केन्द्रीय समिति २ सय ५७ सदस्यीय रहेको थियो ।

वाइसिएल तत्कालीन नेकपा माओवादीले जनयुद्ध सुरुवात गर्दा निर्माण भएको थियो, पछि यसैबाट विकास भएर छापामार दस्ता र जनमुक्ति सेनासम्मको संरचना तयार भएको थियो । जनयुद्धको अवधिभर लगभग वाइसिएलको संरचना सुषुप्त अवस्थामा नै रहेकोमा माओवादी सशस्त्र संघर्षबाट शान्ति प्रक्रियामा आएपछि भने वाइसिएल अत्यन्त क्रियाशील भूमिकामा देखापरेको थियो । विशेषगरी २०६३ मंसिर ७ गते तत्कालीन नेपाल सरकार र माओवादीबीच भएको विस्तृत शान्ति सम्झौतापश्चात जनमुक्ति सेनाहरू क्यान्टोनमेन्टमा राख्ने निर्णय भएपछि माओवादीले वाइसिएललाई क्रियाशील पारेको थियो । वाइसिएलले जनसुरक्षा, विकास निर्माण, जनसंगठकको भूमिकामा आफूलाई स्थापित गराएको थियो ।

शान्ति प्रक्रियामा आएलगत्तै वाइसिएलले राजधानी काठमाडौंमा प्रहरीसँग हातेमालो गर्दै गुन्डागर्दी नियन्त्रण गर्नुका साथै राजधानीमा सरसफाइ अभियान सञ्चालन गरेको थियो । त्यसैगरी, वाइसिएलले भारतद्वारा अतिक्रमित नेपाली भू-भागको सीमाक्षेत्रमै गएर अनुगमन गर्नुका साथै मेची-महाकाली मार्चपाससमेत गरेको थियो । त्यस क्रममा विभिन्न अतिक्रमित स्थलमा भारतीय सीमा सुरक्षा बल एसएसबीसँग झडपसमेत भएको थियो ।